I Burayi: Abantu bashyiriweho uburenganzira bwo kwidagadura bambaye ubusa

Mu gihe ibihugu byinshi byo ku Mugabane w’u Burayi bikomeje kwibasirwa n’ubushyuhe bukabije muri iki gihe cy’impeshyi, agace ka Bredene Nudist Beach gaherereye mu Bubiligi karimo kwakira umubare munini w’abakerarugendo, cyane cyane abifuza kwiruhukira ku mucanga batambaye imyenda.

Nk’uko 7sur7 yabitangaje, ubushyuhe buri kwibasira ibice byinshi by’u Burayi bwatumye abantu benshi bashaka ahantu hatuje kandi hafasha kugabanya ingaruka z’ubushyuhe, bituma Bredene Nudist Beach irushaho kwamamara.

Ubushyuhe bwatumye umubare w’abahasura wiyongera

Amakuru yatangajwe na 7sur7 agaragaza ko muri iyi minsi abantu benshi, barimo n’abatarigeze basura uyu mucanga mbere, bawugana bashaka umuyaga mwiza uva ku nyanja ndetse n’ahantu hatuje hatarangwa n’ubucucike bukunze kuboneka ku zindi nkombe z’inyanja.

Abahasura bavuga ko kuharuhukira bituma bumva batekanye kandi bakoroherwa n’ubushyuhe bukabije buri muri ibi bihe.

Abawusura bavuga ko ubafasha kwisanzuraBamwe mu bamaze imyaka basura uyu mucanga bavuga ko kwidagadura batambaye imyenda ari uburyo bwo kwisanzura no kwiyegereza kamere.

7sur7 yanditse ko bamwe bavuga ko kuba bari ku mucanga cyangwa mu mazi nta myenda bibafasha kurushaho kumva bafite umudendezo no kugabanya ubushyuhe.

Hari n’abahasura ku nshuro ya mbere bavuga ko bahisemo kuhajya nyuma yo kubona ubushyuhe bwo mu ngo no mu mijyi bwakomeje kwiyongera.

Bredene ifite amateka yihariye mu bukerarugendo

Uyu mucanga umaze imyaka irenga 25 ukora nk’ahantu hihariye hagenewe abakunda kwidagadura batambaye imyenda.

Amakuru dukesha 7sur7 agaragaza ko ari hamwe mu hantu hazwi cyane mu Bubiligi mu bukerarugendo bushingiye kuri ubu buryo bwo kwidagadura, bikaba bituma buri mwaka wakira abakerarugendo benshi, cyane cyane mu gihe cy’impeshyi.

Hashyizweho amabwiriza yo kurinda ubuzima bwite bw’abahasura

Nubwo Bredene Nudist Beach izwiho ituze n’umutekano, ubuyobozi bwayo bwatangaje ko bwashyizeho amabwiriza agamije kurinda ubuzima bwite bw’abayisura.

Mu bibazo byagiye bigaragara harimo abantu bafata amafoto y’abandi batabiherewe uburenganzira ndetse n’abinjira mu duce tutagenewe ibikorwa byo kwidagadura bambaye ubusa.

Ni yo mpamvu hashyizweho ibyapa n’amabwiriza asobanura neza aho ibikorwa byemewe n’aho bitemewe, hagamijwe kurinda uburenganzira bw’abahasura no gukomeza kubungabunga umutekano w’aka gace.