Polisi y’u Rwanda ikorera mu Ntara y’Amajyepfo, ku bufatanye n’abaturage, ikomeje ibikorwa byo gukumira no kurwanya ibyaha bitandukanye, cyane cyane ubujura buhungabanya umutekano w’abaturage n’ibyabo.
Muri urwo rwego, kuwa 27 Gicurasi 2026, Polisi ikorera mu Karere ka Ruhango mu Murenge wa Bweramana yafatiye mu cyuho umugabo wari umaze kwiba umucuruzi amafaranga asaga miliyoni imwe n’ibihumbi magana arindwi z’amafaranga y’u Rwanda (1,700,000 Frw).
Amakuru atangwa na Polisi agaragaza ko uwafashwe yatawe muri yombi ku bufatanye n’abaturage bahise batanga amakuru ku gihe, bituma ibikorwa byo kumushakisha bikorwa vuba ndetse afatirwa hafi y’aho yari amaze gukorera icyaha.
Uyu mugabo ubu afungiye kuri Sitasiyo ya Polisi ya Kabagali mu gihe iperereza rikomeje kugira ngo hamenyekane niba hari abandi baba bafatanyije muri ubwo bujura.
Amafaranga yari yibwe yashyikirijwe nyirayo ku bufatanye hagati ya Polisi y’u Rwanda n’Urwego rw’Igihugu rw’Ubugenzacyaha (RIB).
Polisi y’u Rwanda yashimiye abaturage bakomeje kwimakaza umuco mwiza w’ubufatanye n’inzego z’umutekano, cyane cyane mu gutanga amakuru ku gihe no kugira uruhare mu gukumira ibyaha mbere y’uko biba cyangwa gufasha mu gufata ababikoze.
Polisi yavuze ko ubu bufatanye ari bwo musingi ukomeye mu kubungabunga umutekano w’abaturage n’ibyabo.Yanibukije abantu bake bagishora mu bikorwa by’ubujura n’ibindi byaha bihungabanya ituze ry’abaturage ko bakwiye kubihagarika, kuko uwo ari we wese uzabifatirwamo azakomeza gufatwa agashyikirizwa inzego z’ubugenzacyaha kugira ngo amategeko yubahirizwe.
Polisi y’u Rwanda kandi yongeye kwibutsa abaturage ko ubujura atari umwuga ahubwo ari icyaha gihanwa n’amategeko y’u Rwanda.
Izindi nkuru:
Rutsiro: Abaturage basabwe gukaza amarondo nyuma y’ikorwa ry’ubujura bw’Ibendera ry’Igihugu
Sky2 Yatawe muri Yombi Akurikiranyweho Gukubita no Guhoza ku Nkeke Umugore we
Huye: Umwana umwe yapfuye abandi babiri barakomereka mu nkongi y’umuriro yatewe n’amashanyarazi
Umugabo wo muri Nyamasheke Akurikiranyweho Kwica Umugore we Nyuma yo Gutaha Bavuye mu Kabari
Gatsibo: Umusore na nyina batawe muri yombi nyuma yo gukekwaho gutera amazirantoki kwa Mudugudu
Nyanza: Hafashwe umugabo ukekwaho gucuruza inyama z’imbwa mu baturage
Rubavu yashyizeho ingamba zikomeye nyuma y’icyorezo cya ‘Ebola’ kiri muri Goma
Huye: Polisi yasabye abakora mu ibagiro gukaza ingamba zo kurwanya ubujura bw’amatungo
Perezida Kagame yagaragaje icyatuma umutekano wa Afurika ugerwaho utavangiwe n’amahanga
Ngoma: Abakekwaho kwica umusaza bamushakaho amafaranga batawe muri yombi