Ese koko haba hari ibiribwa byongera ingano y’igitsina ? “Sobanukirwa”

Hari abantu benshi bagira impungenge ku ngano y’igitsina cyabo, cyane cyane bitewe n’ibyo babona ku mbuga nkoranyambaga, muri filime cyangwa mu biganiro bitandukanye bikunze kuvuga ko hari uburyo bworoshye bwo kongera uburebure cyangwa umubyimba w’igitsina cy’umugabo.

Ikibazo cy’ubunini bw’igitsina cy’umugabo cyabaye kimwe mu bikomeje kuganirwaho cyane ku mbuga nkoranyambaga no mu biganiro birebana n’ubuzima bw’imyororokere.

Kwamamaza ibinini, amavuta n’imiti bavuga ko yongera ubugabo byazamutse cyane ku Isi, aho ubushakashatsi bugaragaza ko uru rwego ruri mu bwinjiza amafaranga menshi buri mwaka kubera umubare munini w’abagabo bahangayikishijwe n’imiterere y’imibiri yabo.

Ibyo bituma abagabo benshi baba bumva bafite ikibazo cy’ubunini bw’igitsina cyabo, nyamara ubushakashatsi mpuzamahanga bwakozwe ku bagabo barenga 15.000 bwagaragaje ko impuzandengo y’uburebure bw’igitsina cyafashe umurego gishobora kugira hagati ya centimetero 13 na 14 gusa.

Impamvu abantu benshi bahangayikishwa n’ingano y’igitsina

Ubushakashatsi bwakozwe n’ikinyamakuru mpuzamahanga cya siyansi cyitwa British Journal of Urology International (BJUI) ku bagabo basaga 15.000, bwagaragaje ko impuzandengo y’uburebure bw’igitsina cy’umugabo cyafashe umurego neza kiba gifite hagati ya santimetero 12 na 16.

Nyamara muri ubwo bushakashatsi, abagabo benshi bavuze ko bumva bafite ikibazo ku ngano y’igitsina cyabo kandi mu by’ukuri nta kibazo cy’ubuvuzi bafite.

Abahanga bavuga ko impamvu nyinshi zibitera zirimo:

• Kugereranya imibiri yabo n’ibigaragara muri filime z’urukozasoni
• Ibiganiro byo ku mbuga nkoranyambaga bikabya ibintu
• Kutiyizera
• Guterwa ipfunwe n’inshuti cyangwa abo bakundana
• Kwamamaza imiti n’ibinini bivuga ko byongera ubugabo

Nicyo gituma inzego z’ubuzima zivuga ko kenshi ikibazo kiba kiri mu mitekerereze aho kuba mu mubiri.

Ese koko ibiribwa bishobora kongera ingano y’igitsina?

Bamwe bavuga ko hari ibiribwa byihariye bishobora gutuma igitsina cy’umugabo cyikuba kabiri cyangwa kikagera ku bunini budasanzwe. Ariko se ibyo bintu ni ukuri?

Abaganga n’inzobere mu buzima bavuga ko hari ibintu byinshi bikunze kuvugwa nabi kuri iyi ngingo. Basobanura ko ibiribwa bidashobora guhindura mu buryo bw’igitangaza uburebure karemano bw’igitsina cy’umugabo, ariko hari ibifasha umubiri gukora neza, bigatuma amaraso atembera neza ndetse bikagira uruhare mu gutuma umugabo agira ubushake n’imbaraga mu gihe cy’imibonano mpuzabitsina.

Nta bushakashatsi bwa siyansi bwemeza ko hari ibiribwa byonyine bishobora kongera uburebure bw’igitsina cy’umugabo mu buryo buhoraho.

Ariko kandi abaganga bemera ko hari ibiribwa bifasha:

• Gutuma amaraso atembera neza,
• Kongera imbaraga z’umubiri,
• Kugabanya umubyibuho ukabije,
• Kunoza imikorere y’umutima,
• Kongera ubushake bwo gukora imibonano mpuzabitsina

Iyo amaraso atembera neza mu mubiri harimo no mu gitsina, bishobora gutuma umuntu agaragara nk’ufite ubushobozi bwiza mu gihe cy’imibonano.

Igitunguru kiri mu bifasha umubiri gutemberamo amaraso neza

Igitunguru kiri mu biribwa bikunze kuvugwa cyane mu gufasha ubuzima bw’umutima.

Abahanga bavuga ko kirimo antioxidants n’ibinyabutabire bifasha imiyoboro y’amaraso gukora neza.

Iyo amaraso atembera neza:

• Umutima ukora neza
• Umuvuduko w’amaraso ugenda neza
• Imikaya y’umubiri ikabona intungamubiri zihagije

Ibi bishobora kugira uruhare mu gutuma umugabo agira ubushobozi bwinshi mu gihe cy’imibonano mpuzabitsina.

Ariko abaganga basobanura ko igitunguru kidashobora kongera santimetero ku gitsina nk’uko abantu bamwe babivuga.

Imineke n’akamaro kayo ku mubiri

Imineke nayo ikunze kuvugwaho n’abatari bake ku kongera ingano y’igitsina n’ubwo nta bushakashatsi bubyemeza. Ubushakashatsi buvuga ko ikungahaye kuri potassium, umunyu ngugu ufasha umutima n’imitsi gukora neza. Hakaba mo na Potassium ifasha kugabanya umunaniro no gutuma umuvuduko w’amaraso ugenda neza.

Abahanga bavuga ko umubiri ufite ubuzima bwiza ushobora gutuma umuntu:

• Agira imbaraga
• Yumva ashaka gukora imibonano mpuzabitsina
• Agira ubushobozi bwo kwihagararaho igihe kirekire

Ni yo mpamvu imineke ikunze gushyirwa mu biribwa byiza ku bagabo, nubwo idahindura imiterere karemano y’igitsina.

Epinari n’izindi mboga zifasha imitsi gukora neza

Epinari n’izindi mboga z’ibara ry’icyatsi kibisi zikungahaye kuri magnesium.

Magnesium ifasha:

• Imitsi gukora neza
• Imikaya kudacika intege
• Amaraso gutembera neza

Abaganga bavuga ko kurya imboga bihagije bigabanya ibyago byo kugira indwara z’umutima n’umubyibuho ukabije.

Iyo umuntu afite ibinure byinshi ku nda, bishobora gutuma igice cy’igitsina kitagaragara neza, bityo umuntu akumva gisa n’icyagabanutse.

Amafi n’ibirimo Omega-3

Amafi nka salmon, sardines na tuna akungahaye kuri Omega-3.

Omega-3 ifasha:

• Ubwonko gukora neza
• Umutima gukora neza
• Kugabanya cholesterol mbi
• Gutuma amaraso atembera neza

Abaganga bavuga ko ubuzima bwiza bw’umutima ari ingenzi cyane ku bagabo kuko ibibazo byinshi byo kudafata neza kw’igitsina biterwa n’imikorere mibi y’amaraso.

Imbuto n’imboga zitandukanye

Ibihaza, imyungu, watermelon, avoka n’izindi mbuto zirimo vitamines n’intungamubiri zifasha umubiri gukora neza.

Watermelon by’umwihariko ikunze kuvugwaho kuba irimo citrulline, ifasha imiyoboro y’amaraso kuruhuka.

Nubwo bidashobora kongera uburebure bw’igitsina, bishobora gufasha mu gutuma amaraso agenda neza.

Ibyo abaganga bavuga ku miti ivuga ko yongera igitsina

Inzego z’ubuzima n’abaganga benshi baburira abantu kwirinda imiti n’ibinini bicuruzwa bavuga ko byongera uburebure bw’igitsina mu minsi mike.

Bimwe muri byo bishobora:

• Guteza ikibazo cy’umutima
• Gutera umuvuduko w’amaraso
• Kwangiza impyiko
• Guteza ikibazo cyo kudafata neza kw’igitsina burundu
• Gutera ihungabana ryo mu mutwe

Nubwo imibare nyayo y’abajya kwivuza nyuma yo gukoresha imiti yongera ubugabo itaramenyekana neza, ubushakashatsi mpuzamahanga bugaragaza ko abagabo benshi bakoresha iyo miti baba babikoze nta kibazo cy’ubuvuzi basanzwe bafite. Hari n’ubushakashatsi bwerekanye ko hagati ya 30% na 40% by’abagana abaganga b’inzobere mu kubaga ubugabo baba baje gukosora ibyangiritse batewe n’uburyo butizewe bwo kongera ubugabo bakoresheje.

Ni ryari umuntu aba afite ikibazo cy’ubuvuzi?

Abaganga bavuga ko igitsina gito cyane ku rwego rw’ubuvuzi ari igihe gifite munsi ya santimetero 7 igihe cyafashe umurego neza. Iyo umuntu yumva afite ikibazo gikomeye:

• Kudafata neza kw’igitsina
• Kutagira ubushake bwo gukora imibonano
• Kubabara
• Guhangayika bikabije

Aba asabwa kugana umuganga w’inzobere aho gukoresha imiti ya magendu.

Imibereho myiza irafasha kurusha gukoresha ibinini byinshi

Abaganga bavuga ko ibintu bifasha cyane umugabo kugira ubuzima bwiza bw’imyororokere harimo:

• Gukora siporo

Siporo ifasha amaraso gutembera neza no kugabanya ibinure.

• Kureka kunywa itabi

Itabi ryangiza imiyoboro y’amaraso kandi rikagira ingaruka ku bushobozi bw’igitsina.

• Kugabanya inzoga nyinshi

Inzoga nyinshi zishobora kugabanya ubushake n’imbaraga.Kurya indyo yuzuye

• Kurya indyo yuzuye

Kurya imboga, imbuto, amafi n’ibiribwa bifite intungamubiri ni ingenzi.

• Gusinzira bihagije

Gusinzira neza bifasha umubiri gukora imisemburo neza.

• Kugabanya stress

Guhangayika cyane bishobora gutuma umuntu atagira ubushake cyangwa ngo igitsina gifate neza.

Abahanga basaba abantu kwirinda kugendera ku makuru yo ku mbuga nkoranyambaga

Muri iki gihe, hari amashusho n’amatangazo byinshi bivuga ko umuntu ashobora kongera igitsina mu minsi mike.

Abahanga bavuga ko benshi mu babivuga baba bashaka amafaranga aho kuba gufasha abantu.

Basaba abantu:

• Kwisuzuma mbere yo kwizera amakuru yose
• Kugisha inama abaganga
• Kwirinda imiti itazwi
• Kumenya ko ubuzima bwiza bw’umubiri ari bwo bw’ibanze cyane

Nubwo hari ibiribwa bifasha umubiri gukora neza no gutuma amaraso atembera neza, nta biribwa byemejwe na siyansi bishobora kongera uburebure bw’igitsina cy’umugabo mu buryo bw’igitangaza.

Icy’ingenzi ni ukugira ubuzima bwiza, gukora siporo, kurya neza no kwirinda imiti itemewe.

Abaganga bavuga kandi ko abagabo benshi bafite impungenge ku ngano y’igitsina cyabo kandi mu by’ukuri nta kibazo cy’ubuvuzi bafite.

Ni yo mpamvu gusobanukirwa neza amakuru no kugisha inama inzobere ari ingenzi kurusha kwizera amatangazo yose aca ku mbuga nkoranyambaga.