Impamvu Gusubiramo Ikintu Ari Inzira Iganisha ku Ntsinzi

Ubusesenguzi bushingiye ku ngingo zasohowe na Psychology Today

Mu buzima bwa buri munsi, abantu benshi bifuza gutsinda vuba. Hari ushaka kwiga ururimi rushya mu mezi make, undi akaba yifuza kuba umuhanga mu muziki, siporo cyangwa ubucuruzi adaciye mu rugendo rurerure rw’imyitozo. Nyamara ubushakashatsi mu mitekerereze ya muntu (psychology) bugaragaza ko hari ihame rimwe ridahinduka: gusubiramo ikintu inshuro nyinshi ni cyo gitanga umusingi w’ubumenyi n’ubuhanga burambye.

Ikinyamakuru Psychology Today kigaragaza ko repetition, ari yo gusubiramo igikorwa cyangwa amasomo kenshi, ari imwe mu nzira zifasha ubwonko kubika amakuru igihe kirekire, kubaka imyitwarire mishya no kongera ubushobozi bwo gukora ibintu umuntu atabanje kubitekerezaho cyane.

Kuki Gusubiramo Ari Ingenzi Mu Kwiga?

Abahanga bavuga ko iyo umuntu yiga ikintu rimwe gusa, ubwonko bubanza kubika ayo makuru mu bubiko bw’igihe gito (short-term memory). Iyo adasubiye muri ayo masomo cyangwa iyo myitozo, ayo makuru ashobora kuzimira mu gihe gito.

Ariko iyo umuntu akomeje gusubiramo ibyo yize cyangwa ibyo akora, ubwonko butangira kubyimurira mu bubiko bw’igihe kirekire (long-term memory), aho biba byoroshye kubyibuka no kubikoresha mu buzima bwa buri munsi.

Ni yo mpamvu abanyeshuri basabwa gusubiramo amasomo, abaririmbyi bagakora imyitozo buri munsi, ndetse n’abakinnyi ba siporo bagatozwa inshuro nyinshi imyitozo imwe.

Intsinzi Yubakwa n’Uko Uhora Ukora Ikintu

Mu rwego rwa siporo, nta mukinnyi uba icyamamare nyuma yo gukora imyitozo rimwe cyangwa kabiri.

Abakinnyi bakomeye ku isi bamara imyaka myinshi basubiramo imyitozo imwe buri munsi kugeza igihe iba kimwe mu bigize ubuzima bwabo.

Ni nako bigenda ku bacuranzi. Gucuranga indirimbo inshuro nyinshi bituma intoki, ubwonko n’amatwi bikorana mu buryo bwihuse, ku buryo umuntu ashobora gucuranga adatekereje kuri buri noti.

Psychology Today ivuga ko repetition ari yo ihindura ibikorwa bisanzwe bikavamo ubuhanga budasanzwe.

Uko Gusubiramo Byubaka AkamenyeroIyo umuntu asubiyemo ikintu buri gihe, kigenda kiba akamenyero.

Mu mitekerereze ya muntu, ibi bizwi nk’uko ibikorwa byimukira mu rwego rw’ubwonko bukora ibintu bwikora (subconscious mind).

Urugero, umuntu wiga gutwara imodoka aba atekereza kuri buri gikorwa akora. Ariko nyuma y’igihe, ashobora gutwara imodoka akanaganira n’undi muntu kuko byinshi biba byarahindutse akamenyero.

Ni nako bimeze ku muntu ushaka kwandika neza, kuvuga ururimi rushya cyangwa gukora siporo. Gusubiramo ni byo bituma ubwonko n’umubiri bimenyera icyo gikorwa.

Kumenyera Ikintu Bituma Kiturushaho Kugushimisha

Hari ihame rizwi muri psychology ryitwa “Mere Exposure Effect.”Iri hame risobanura ko uko umuntu agenda ahura n’ikintu kenshi, ari na ko agenda akigirira icyizere no kugikunda.

Ni yo mpamvu indirimbo ushobora kutakunda uyumvise bwa mbere, nyuma yo kuyumva inshuro nyinshi usanga wayikunze.

Ni na yo mpamvu abantu benshi bagenda bakunda ikawa, impumuro runaka cyangwa ahantu runaka nyuma yo kuhahora.

Abahanga bavuga ko kumenyera ikintu bitanga ituze mu mitekerereze kandi bikagabanya ubwoba bwo kugerageza ibishya.

Gusubira Ku Kintu Bigufasha Kukibona Mu Buryo Bushya

Psychology Today ivuga ko umuntu akenshi adashobora kubona buri kantu kose iyo abonye cyangwa akoze ikintu bwa mbere.

Iyo asubiye ku gitabo yasomye, filimi yarebye cyangwa aho yigeze gusura, ashobora kuvumbura ibintu atigeze abona mbere.

Ni yo mpamvu abantu bamwe basoma igitabo kimwe inshuro nyinshi, ariko buri nshuro bakagira ubumenyi bushya.

Ibi biterwa n’uko uburambe n’ibitekerezo by’umuntu bihinduka uko imyaka ishira, bigatuma asobanukirwa ibintu mu buryo bwagutse kurushaho.

Impamvu Umuziki Wifashisha Repetition

Mu muziki, repetition ni imwe mu nkingi ziwugize.

Abahanga bavuga ko gusubiramo injyana cyangwa amagambo mu ndirimbo bituma uyumva uyibuka byoroshye.

Iyo buri gice cy’indirimbo kiba gitandukanye n’ikindi, biragora kuyifata mu mutwe.

Ariko iyo injyana cyangwa amagambo asubiwemo, bituma uyumva ategereza kongera kuyumva, bikamuha ibyishimo.

Ni yo mpamvu indirimbo nyinshi zakunzwe ku isi ziba zifite chorus cyangwa refrain isubirwamo inshuro nyinshi.

Ese Gusubiramo Bishobora Gufasha Abakuze?

Ubushakashatsi bwerekana ko repetition itagirira akamaro abana cyangwa urubyiruko gusa.

No ku bantu bakuze, gukomeza gukora imyitozo yo gutekereza, gusoma, kwandika cyangwa kwiga ibintu bishya bifasha kongera ubushobozi bw’ubwonko no kugabanya kugabanuka kw’ubushobozi bwo kwibuka.

Abahanga bavuga ko ubwonko bukomeza kwiga igihe cyose umuntu akomeje kubukoresha.

Isomo Rikuru

Mu buzima, abantu benshi bareka kugerageza kuko batabonye ibisubizo byihuse.

Ariko ubushakashatsi bugaragaza ko intsinzi idaturuka ku mpano gusa, ahubwo ishingiye cyane ku kwihangana no gusubiramo ibikorwa.

Abahanzi, abakinnyi ba siporo, abarimu, abaganga n’abandi banyamwuga bamara imyaka myinshi bakora imyitozo no kunoza ibyo bakora.

Gusubiramo ntabwo ari uguta igihe; ni uburyo ubwonko bwubaka ubumenyi, bugatera imbere kandi bugafasha umuntu kugera ku rwego rwo gukora ibintu neza kandi abyizeye.

Mu gihe isi ikomeza guhinduka, ubushobozi bwo gukomeza kwiga no gusubiramo ibyo umuntu yize bukomeje kuba kimwe mu bikoresho bikomeye bifasha umuntu kugera ku ntego ze.

Nk’uko Psychology Today ibigaragaza, gusubiramo ni urugendo ruhindura ubumenyi bukaba ubuhanga, ubuhanga bukabyara icyizere, kandi icyo cyizere kikavamo intsinzi irambye.