Kutabasha gushyukwa neza cyangwa kugumana ubushakwe n’ubushobozi bwo gukora imibonano mpuzabitsina (erectile dysfunction) si ikibazo kireba ubuzima bw’imyororokere gusa. Abashakashatsi bavuga ko gishobora kuba kimwe mu bimenyetso bya mbere by’indwara zikomeye zirimo iz’umutima, diyabete, stroke ndetse n’izifata ubwonko.
Ubushakashatsi butandukanye bugaragaza ko iki kibazo gikunze kugaragara ku bagabo benshi bafite imyaka 40 kuzamura. Nubwo bimeze bityo, benshi ntibakunda kukivugaho kubera isoni cyangwa gutinya uko abandi babifata, bikaba bituma batabona ubufasha hakiri kare.
Abahanga mu buzima bavuga ko ubushobozi bwo gushyukwa neza bushingira ku mikorere myiza y’imitsi itwara amaraso, imyakura ndetse n’ubwonko. Iyo hari ikibazo muri imwe muri izo nzego, bishobora kubanza kugaragarira mu kugabanuka cyangwa kubura ubushobozi bwo gushyukwa.
Ni yo mpamvu abaganga bamwe bafata iki kibazo nk’ikimenyetso gishobora kuburira umugabo ko hari indi ndwara iri gutangira kumwibasira.
Isano N’Indwara Z’Umutima
Ubushakashatsi bwerekana ko kutabasha gushyukwa neza bishobora kubanziriza imyaka myinshi ibimenyetso by’indwara z’umutima. Ibi biterwa n’uko imitsi ijyana amaraso mu gitsina iba mito kurusha iyijyana amaraso mu mutima, bityo ikaba ishobora kwangirika mbere.
Iyo amaraso adatembera neza, ubushobozi bwo gushyukwa buragabanuka, bikaba bishobora kuba impuruza y’ibibazo by’imitsi n’umutima.
Diyabete na Yo Ifitanye Isano
Indwara ya diyabete na yo iri mu zitera iki kibazo. Isukari nyinshi mu maraso ishobora kwangiza imyakura n’imitsi itwara amaraso, bikagira ingaruka ku bushobozi bwo gushyukwa.
Hari abagabo benshi basanga bafite iki kibazo mbere y’uko bamenya ko barwaye diyabete.
Gushobora Kuburira Stroke n’Indwara z’Ubwonko
Abahanga kandi bagaragaza ko abagabo bafite ibibazo byo kudashyukwa neza bashobora kugira ibyago byinshi byo guhura na stroke cyangwa indwara zifata ubwonko zirimo kwibagirwa gukabije (dementia).
Ibi biterwa ahanini n’uko ibibazo by’imitsi n’amaraso bishobora kugira ingaruka ku bice bitandukanye by’umubiri, harimo ubwonko.
Kuki Abagabo Bakwiye Kubifata Nk’Ikibazo Cy’Ubuzima Rusange?
Umuhanga mu by’ubuzima bw’imyororokere, Emmanuele Jannini wo muri Kaminuza ya Rome Tor Vergata mu Butaliyani, avuga ko kutabasha gushyukwa neza akenshi ari “ikimenyetso cy’ikibazo gikomeye gishobora kuba kiri imbere.”Asobanura ko gusuzuma iki kibazo hakiri kare bishobora gufasha abaganga gutahura indwara zikomeye mbere y’uko zigera ku rwego rukomeye.
Ntukagire Isoni Zo Kugisha Inama Muganga
Nubwo benshi bakibona nk’ikibazo cyo mu cyumba cy’abashakanye gusa, abaganga basaba abagabo kutagisuzugura. Iyo kimaze igihe cyangwa kikaba gisubiramo kenshi, ni byiza kugana muganga kugira ngo hasuzumwe niba nta zindi ndwara zaba zibitera.
Kuvugisha ukuri no gushaka ubufasha kare bishobora kurinda ubuzima no kugabanya ibyago byo kurwara indwara zikomeye mu gihe kiri imbere.
Kutabasha gushyukwa neza si ikibazo cy’imibonano mpuzabitsina gusa; gishobora kuba ubutumwa umubiri uba uri gutanga bukwereka ko hari ikindi kibazo cy’ubuzima kigikeneye kwitabwaho hakiri kare.
Izindi nkuru:
Menya indwara zitandukanye zifata ‘Prostate’ n’uburyo wakwirinda
Ibiryo Urya Buri Munsi Bishobora Kukurinda Indwara Cyangwa Kuzigutera
RAB yatangiye gukurikirana abaveterineri bakingira ikibaba abarya amatungo yipfushije
Sobanukirwa akaga gaterwa no kurya amafunguro atujuje ubuziranenge
Watermelon: Imbuto yoroshye ariko ifite akamaro gatangaje ku buzima bw’imibonano mpuzabitsina
Sobanukirwa ibimenyetso simusiga byakwereka ko uri kugira isukari nyinshi mu mubiri
Impamvu Abaganga Bashishikariza Abantu Gukora Imyitozo Ngororamubiri .
Ise: Indwara y’uruhu ifata benshi ariko ikaba ivurwa igakira
Menya amabanga y’ubuzima atuma Abayapani baramba kurusha abandi ku Isi
Imipaka ya Rubavu na Goma yafunzwe by’agateganyo kubera ‘Ebola’